Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
<<Dem. 18.281 | Dem. 18.284 (English) | >>Dem. 18.286 |
18.282ἆρʼ οὖν οὐδὲ σύ ; καὶ πῶς ; ὃς εὐθέως μετὰ τὴν μάχην πρεσβευτὴς ἐπορεύου πρὸς Φίλιππον , ὃς ἦν τῶν ἐν ἐκείνοις τοῖς χρόνοις συμφορῶν αἴτιος τῇ πατρίδι , καὶ ταῦτʼ ἀρνούμενος πάντα τὸν ἔμπροσθε χρόνον ταύτην τὴν χρείαν , ὡς πάντες ἴσασιν . καίτοι τίς ὁ τὴν πόλιν ἐξαπατῶν ; οὐχ ὁ μὴ λέγων ἃ φρονεῖ ; τῷ δʼ ὁ κῆρυξ καταρᾶται δικαίως ; οὐ τῷ τοιούτῳ ; τί δὲ μεῖζον ἔχοι τις ἂν εἰπεῖν ἀδίκημα κατʼ ἀνδρὸς ῥήτορος ἢ εἰ μὴ ταὐτὰ φρονεῖ καὶ λέγει ; σὺ τοίνυν οὗτος εὑρέθης .
18.283εἶτα σὺ φθέγγει καὶ βλέπειν εἰς τὰ τούτων πρόσωπα τολμᾷς ; πότερʼ οὐχ ἡγεῖ γιγνώσκειν αὐτοὺς ὅστις εἶ ; ἢ τοσοῦτον ὕπνον καὶ λήθην ἅπαντας ἔχειν ὥστʼ οὐ μεμνῆσθαι τοὺς λόγους οὓς ἐδημηγόρεις ἐν τῷ πολέμῳ , καταρώμενος καὶ διομνύμενος μηδὲν εἶναι σοὶ καὶ Φιλίππῳ πρᾶγμα , ἀλλʼ ἐμὲ τὴν αἰτίαν σοι ταύτην ἐπάγειν τῆς ἰδίας ἕνεκʼ ἔχθρας , οὐκ οὖσαν ἀληθῆ .
18.284ὡς δʼ ἀπηγγέλθη τάχισθʼ ἡ μάχη , οὐδὲν τούτων φροντίσας εὐθέως ὡμολόγεις καὶ προσεποιοῦ φιλίαν καὶ ξενίαν εἶναί σοι πρὸς αὐτόν , τῇ μισθαρνίᾳ ταῦτα μετατιθέμενος τὰ ὀνόματα · ἐκ ποίας γὰρ ἴσης ἢ δικαίας προφάσεως Αἰσχίνῃ τῷ Γλαυκοθέας τῆς τυμπανιστρίας ξένος ἢ φίλος ἢ γνώριμος ἦν Φίλιππος ; ἐγὼ μὲν οὐχ ὁρῶ , ἀλλʼ ἐμισθώθης ἐπὶ τῷ τὰ τουτωνὶ συμφέροντα διαφθείρειν . ἀλλʼ ὅμως , οὕτω φανερῶς αὐτὸς εἰλημμένος προδότης καὶ κατὰ σαυτοῦ μηνυτὴς ἐπὶ τοῖς συμβᾶσιν γεγονώς , ἐμοὶ λοιδορεῖ καὶ ὀνειδίζεις ταῦτα , ὧν πάντας μᾶλλον αἰτίους εὑρήσεις .
Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
<<Dem. 18.281 | Dem. 18.284 (English) | >>Dem. 18.286 |